रामेछाप/ नेपाली कांग्रेसको १५ औँ महाधिवेशनबाट आदिवासी जनजाति क्लस्टरतर्फ केन्द्रीय सदस्यमा निर्वाचित गेल्जे लामा शेर्पाको केन्द्रीय समितिमा प्रवेशलाई समावेशी प्रतिनिधित्वको सुदृढीकरणसँगै पार्टी संगठनभित्र एकता र सहकार्य विस्तारको अवसरका रूपमा हेरिएको छ।
नेपाल आदिवासी जनजाति महासंघका निवर्तमान अध्यक्ष तथा शेर्पा संघका अध्यक्षसमेत रहेका शेर्पा सामाजिक, संस्थागत र व्यावसायिक क्षेत्रमा सक्रिय व्यक्तित्व हुन्। रामेछापबाट महाधिवेशन प्रतिनिधिका रूपमा निर्वाचित हुँदै पार्टीको केन्द्रीय नेतृत्वसम्म पुगेका शेर्पासँग समुदायको प्रतिनिधित्व, संस्थागत नेतृत्व र संगठनात्मक समन्वयको अनुभव छ।
उनको केन्द्रीय समितिमा उपस्थितिले कांग्रेसभित्र आदिवासी जनजाति समुदायका मुद्दा, पहिचान, अधिकार र सम्मानका सवाललाई थप प्रभावकारी ढङ्गले उठाउने अपेक्षा गरिएको छ। समावेशी लोकतन्त्रको अभ्यासलाई बलियो बनाउँदै समुदायका सरोकारलाई पार्टीको नीति, कार्यक्रम र निर्णय प्रक्रियासँग जोड्न उनको भूमिका महत्त्वपूर्ण हुन सक्ने देखिन्छ। विशेषगरी गृह जिल्ला रामेछापमा कांग्रेसको संगठनात्मक एकता मजबुत बनाउने, नेता–कार्यकर्ताबीच आपसी विश्वास र सहकार्य बढाउने तथा पार्टी संगठनलाई थप गतिशील बनाउने सन्दर्भमा शेर्पाको भूमिका चासोका साथ हेरिएको छ।
जिल्लामा पार्टीभित्र देखिने मतभिन्नतालाई संवाद र सहकार्यका माध्यमबाट सम्बोधन गर्दै संगठनलाई एकताबद्ध बनाउनु उनका लागि महत्त्वपूर्ण जिम्मेवारी हुनेछ। सामाजिक तथा संस्थागत नेतृत्वमा हासिल गरेको अनुभवलाई पार्टी संगठनको हितमा उपयोग गर्न सके शेर्पाले केन्द्रीय तह र स्थानीय संगठनबीच प्रभावकारी समन्वय स्थापित गर्न सक्ने अपेक्षा गरिएको छ। साथै, आदिवासी जनजाति समुदायको प्रतिनिधित्वलाई औपचारिक सहभागितामा मात्र सीमित नराखी नीतिगत निर्णय र नेतृत्व विकासमा समेत अर्थपूर्ण बनाउनुपर्ने चुनौती पनि उनीसामु रहनेछ।
समावेशी प्रतिनिधित्वलाई संगठनात्मक एकता र प्रभावकारी नेतृत्वसँग जोड्न सक्नु नै शेर्पाको केन्द्रीय जिम्मेवारीको महत्त्वपूर्ण पक्ष हुनेछ। उनको नेतृत्वले नेपाली कांग्रेसको राष्ट्रिय राजनीतिमा आदिवासी जनजाति समुदायको आवाज सशक्त बनाउनुका साथै रामेछापमा पार्टी संगठनलाई थप एकताबद्ध, सक्रिय र सुदृढ बनाउन योगदान पुर्याउने अपेक्षा गरिएको छ।
प्रतिक्रिया दिनुहोस्