काठमाडौँ/नेपाली–अष्ट्रेलियाली उद्यमी तथा सामुदायिक अगुवा प्रमेज (पिजे) श्रेष्ठलाई अष्ट्रेलियन क्याथोलिक युनिभर्सिटी (ACU) को सन् २०२६ को ग्लोबल कनेक्सन अलुम्नाई अवार्ड प्रदान गरिएको छ ।
व्यवसाय, सार्वजनिक जीवन र सामुदायिक सेवामार्फत अष्ट्रेलिया र नेपाललाई जोड्ने काममा पु¥याएको योगदानको कदरस्वरूप उनलाई यो सम्मान दिइएको हो । सल्लाहकार फर्म ’डिजिटल कन्सल्टिङ भेन्चर्स’ का संस्थापक तथा प्रमुख कार्यकारी अधिकृत (CEO) समेत रहेका श्रेष्ठले अष्ट्रेलियाको संघीय निर्वाचनमा उम्मेदवारी दिनुका साथै युवा नेपाली–अष्ट्रेलियालीहरूलाई सहयोग गर्ने विभिन्न पहलहरू पनि सुरु गरेका छन् ।
एसीयू अलुम्नाई अवाड्र्सले विश्वभर छरिएर रहेका एक लाख ५५ हजारभन्दा बढी पूर्व विद्यार्थीहरूको उपलब्धिको उत्सव मनाउँछ । विश्वव्यापी सम्बन्ध, अन्तर सांस्कृतिक समझदारी र अन्तर्राष्ट्रिय सहकार्यमा उत्कृष्ट योगदान पु¥याउँदै विश्वविद्यालयको एकताबद्ध र समावेशी विश्वको परिकल्पनालाई अघि बढाउने पूर्व विद्यार्थीलाई यो पुरस्कार प्रदान गरिदै आएको छ ।
यस वर्षको पुरस्कार घोषणा गर्दै एसीयूका उपकुलपति तथा अध्यक्ष प्रोफेसर ज्लाट्को स्क्रबिसले भने– प्रतिभा र दृढ संकल्पलाई समाजमा परिवर्तन ल्याउने प्रतिबद्धतासँग जोड्दा के सम्भव छ भन्ने कुरा हाम्रा पूर्व विद्यार्थीहरूले देखाएका छन् ।
नेपाली–अष्ट्रेलियाली समुदायमा उनले गरेको कामले उनलाई क्यानबेरास्थित गभर्नमेन्ट हाउससम्म पु¥यायो, जहाँ गभर्नर–जनरल साम मोस्टिन एसीले १५ अगस्ट २०२४ मा उनलाई स्वागत गरेकी थिइन् । सन् २०१९ मा श्रेष्ठ अष्ट्रेलियाको संघीय निर्वाचनमा प्रमुख राजनीतिक दलबाट उम्मेदवार बन्ने नेपाली मूलको पहिलो व्यक्ति बनेका थिए । उनले तत्कालीन प्रधानमन्त्री स्कट मोरिसनको चुनावी टोलीको हिस्साका रूपमा सत्तारूढ लिबरल पार्टीको प्रतिनिधित्व गरेका थिए ।
श्रेष्ठलाई ४० अन्डर ४० मोस्ट इन्फ्लुएन्सियल एसियन–अष्ट्रेलियन अवाड्र्स (हाल एसियन अष्ट्रेलियन लिडरशिप अवाड्र्स भनिन्छ) बाट पनि सम्मान गरिएको थियो । मेलबर्न विश्वविद्यालयको एसियालिङ्क र जोन्सन पार्टनर्सको पहलमा सञ्चालित उक्त अवार्डले सन् २०२४ मा उनलाई सामुदायिक र वकालत विधामा फाइनलिस्टका रूपमा पहिचान दिएको थियो । सिड्नीमा आयोजित उक्त समारोहमा अष्ट्रेलियाकी विदेशमन्त्री सिनेटर पेनी वोङ पनि सहभागी थिइन् । श्रेष्ठले सन् २०१६ मा मिस्टर नेपाल ओसियाना को उपाधि पनि जितेका थिए ।
उनको सामुदायिक कार्यमा युवा तथा उद्यमीहरूलाई मार्गदर्शन गर्ने र अष्ट्रेलिया तथा नेपालका व्यवसाय, सरकार र सामुदायिक अगुवाहरूलाई एकै ठाउँमा ल्याउने काम समावेश छ । सन् २०२६ मा नेपालमा गएको बाढीको समयमा उनले स्थलगत रूपमै खटिएर स्रोतसाधनको समन्वय गर्न र अष्ट्रेलियामा रहेका परिवार तथा समर्थकहरूसँग सञ्चार कायम राख्न मद्दत गरेका थिए ।
सन् २०१५ मा ब्याचलर अफ कमर्स उत्तीर्ण गरेका श्रेष्ठका लागि एसीयूको यो सम्मान व्यक्तिगत रूपमा पनि निकै विशेष छ । उनले आफ्नो क्षमता पहिचान गर्न र सही दिशा दिन विश्वविद्यालयका प्राध्यापक र करियर टोलीले मद्दत गरेको भन्दै श्रेय दिएका छन् ।

प्रतिक्रिया दिनुहोस्