दोलखा/दोलखाको भीमेश्वर नगरपालिका वडा नम्बर ३ चिसापानी भालुखोलाको जङ्गलमा शुक्रवार (आज) हातखुट्टा बाँधेर मुखमा टेप लगाएको अवस्थामा अन्दाजी २०÷२२ बर्षको एक युवकको शव भेटिएको जिल्ला प्रहरी कार्यालय दोलखाले जनाएको छ ।
स्थानिय महिलाहरु बाँदर लखेट्दै जाने क्रममा माटोले छोपेको अवस्थामा उक्त शव देखेपछि प्रहरीलाई खबर गरेका थिए । हालसम्म उक्त शवको पहिचान नखुलेको जिल्ला प्रहरी कार्यालय दोलखाका प्रहरी नायव उपरीक्षक गंगाप्रसाद पौडेलले बताउनु भयो । शव पहिचान गर्न काठमाडौँ टिचिङ अस्पताल पठाईएको पनि प्रहरी नायव उपरीक्षक पौडेलले बताउनु भयो ।
दोलखा प्रहरीमा युवक हराएको बारेमा कुनै उजुरी समेत नपरेको प्रहरीले जनाएको छ । शवको पहिचानको लागि युवकको हुलिया सहितको विवरण ७७ वटै प्रहरी कार्यालयमा पठाईएको र सो बारे अनुसन्धान सुरु गरिएको प्रहरी नायव उपरीक्षक पौडेलले बताउनु भयो ।
हात खुट्टा बाँधिएको अवस्थामा युवकको शव भेटियो
प्रतिक्रिया दिनुहोस्