दोलखा/पिउने पानीको समस्या भोगिरहेका दोलखा कालिञ्चोक गाँउपालिका वडा नम्बर– ४ हिलेपानीका स्थानीयको घर– घरमा अहिले धारा जोडिएको छ । पानीकै समस्याका कारण गाँउ छोडेका स्थानीय घर– घरमा धारा जोडिन थालेपछि आफ्नै थातथलो फर्कन लागेको वडा नम्बर– ४ का वडा अध्यक्ष दिपक खुलालले बताउनु भयो ।
कालिञ्चोक गाँउपालिका वडा नम्बर– ४ हिलेपानीमा एक सय २६ घरधुरी रहेको छ । त्यसमा करिब ७० घरधुरीका मानिस राजधानि काठमाडौँमा रहेको वडा अध्यक्ष खुलालले बताउनु भयो ।
घर छोडेका धेरै स्थानीय पानीको समस्याकै कारण हिडेका हुन् वडा अध्यक्ष खुलालले भन्नु भयो– त्यसैले वडाको विशेष पहलमा अहिले प्रत्येकको घर– घरमा धारा जोडिएको छ । गाँउमा सडक पुगिसकेको छ, घर– घरमा धारा पनि जोडिसकियो वडा अध्यक्ष खुलालले भन्नु भयो– अब राजधानि पुगेका स्थानीय आफ्नै थातथलो फर्कने अपेक्षा गरेका छौ । स्थानीय दिपक घिमिरे, चित्रशङ्कर घिमिरे, ताराशङ्कर घिमिरे, ताराबहादुर कार्की लगायत आफ्नो थातथलो फर्कीसकेको वडा अध्यक्ष खुलालको भनाई छ ।
स्थानीय जेष्ठ नागरिक गंगामाया भण्डारी पनि हिलेपानीका धेरै छिमेकी पानीको समस्याकै कारण घर छोडेर राजधानि हिडेको बताउनु हुन्छ । केही समय अघिसम्म हिलेपानीका मानिसले पानी खान हिलेपानी स्कूल नजिकको ठूल्धारामात्र थियो गंगामायाले भन्नु भयो– पानी थाप्नेको भीड हुने भएकोले एक गाग्री पानीको लागि घण्टौ पर्खनु पथ्र्यो ।
अर्को स्थानीय जेष्ठ नागरिक रत्नमाया खतिवडा हिलेपानीमा केही समय अघिसम्म एउटामात्र धारा भएकोले पानी लिन एक÷ दुई घण्टा टाढासम्म जानुपर्ने अवस्था रहेको बताउनु हुन्छ । अहिले वडाले घर– घरमा धारा जोडिदिएको छ, गाँउमा सडक पनि आएको छ रत्नमाया भन्नु हुन्छ– अब घर छोडेर नेपाल गएका छिमेकी फर्कने आशामा छौ ।
कालिञ्चोक गाँउपालिका वडा नम्बर– ४ को पहलमा दुईबर्ष अघि हिलेपानी र माथिल्लो गुमुमा सुरु भएको मिरेक्पा संस्कृतग्राम खानेपानी आयोजनाले अहिलेसम्म एक सय १६ घरमा धारा बनाई सकेको र अब २४ वटा घरम धारा बनाउन बाँकी रहेको वडा अध्यक्ष दिपक खुलालले बताए ।
वडाको पहलमा कालिञ्चोक गाँउपालिकाले क्रमागत बजेट अन्र्तगत सुरु गरेको वडा नम्बर ३ र ४ लक्षित खानेपानी आयोजनाको लागि ११ किलोमिटर टाढा मिरेक्पाबाट पानी ल्याईएको वडा अध्यक्ष खुलालले बताउनु भयो ।
प्रतिक्रिया दिनुहोस्