काठमाडौँ/नेपाल– चीन कुटनीतिक सम्बन्ध स्थापना भएको ७० बर्ष पुगेको अवसरमा फ्रेण्डस एन दि क्लाउडः प्लेटफर्म अफ इन्फुलेन्स नेपालले मुलुकको विकासमा चीनको भुमिका विषयमा छलफल आयोजना गरेको छ ।
बत्तिस पुतलि स्थित होटल तपसमा आयोजना गरिएको कार्यक्रममा चीनका लागि नेपालका पूर्व राजदूत एवम पूर्व परराष्ट्र मन्त्री महेन्द्र बहादुर पाण्डेले लिपुलेख, लिम्पियाधुरा र कालापानी नाका हुदै भारत– चीन बीच व्यापारीक सहमति भएको विषयमा प्रधानमन्त्री केपी शर्मा ओलीले सुझबुझ पूर्ण कदम चाल्नुपर्ने बताएका छन् ।
यहिबेला प्रधानमन्त्री ओलीको भारत र चीन दुबै मुलुकमा भ्रमण रहेकोले लिपुलेख, लिम्पियाधुरा र कालापानी नाकाको विषयमा अनुकुल वातावरण बनाएर दुबै देशसंग परिणाममुखी वार्ता गर्नुपर्ने पूर्व परराष्ट्रमन्त्री पाण्डेको सुझाब छ ।
प्राध्यापक डा. सुरेन्द्र केसीले नेपालको सुरक्षामा चीननै ढाडसको रुपमा रहेको बताए । उनले अंशुवर्मा, भृकुटी, अरनिको लगायतबाट जोडिएको नेपाल– चीन सम्बन्ध अहिले राजनीतिक र जनस्तरसम्मै बलियो हुदै गएको बताए ।
परराष्ट्रविद् डा. मनिता कुशीले नेपालको समग्र हित र विकासको लागि चीनको भूमिका अपरिहार्य रहेको बताईन ।
कार्यक्रम आयोजक संस्था फ्रेण्डस एन दि क्लाउडः प्लेटफर्म अफ इन्फुलेन्स नेपालका अध्यक्ष समाजसेवी शोभित उप्रेतीले चीन आर्थिक रुपमा विश्वको पहिलो शक्ति बन्नै लाग्दा नेपाल भने झिनामसिना कुरामा अड्कीनु दुःखद रहेको बताए । उनले नेपाल– चीन बीच कुटनीतिक सम्बन्ध स्थापना भएको ७० बर्ष पुगेको विषय आफैमा गौरवमय रहेको उल्लेख गर्दै चीनको समृद्धिबाट नेपालले पनि लाभ लिनसक्नुपर्ने बताए ।
कार्यक्रममा अन्तराष्ट्रिय क्षेत्रका विज्ञ, राजनीतिज्ञ, जनप्रतिनिधि र पत्रकारहरुको सहभागिता रहेको थियो ।
प्रतिक्रिया दिनुहोस्