दोलखा/नेकपा एमाले दोलखाले पार्टीको विधानमा उमेरको हद र कार्यकाल सम्बन्धि प्रावधानमा बन्देज लगाउन नहुने निर्णय गरेको छ । पार्टीको प्रस्तावित विधान मस्यौदामा राखिएको उमेर हद र कार्यकाल सम्बन्धि प्रावधानमा बन्देज लगाउन नहुने विषय उपयुक्त रहेको निष्कर्ष नेकपा एमाले दोलखा जिल्ला कमिटीको सातौ बैठकले निकालेको अध्यक्ष नरबहादुर श्रेष्ठले बताउनु भयो ।
यो निष्कर्ष पार्टीको टोल, वडा तथा पालिका कमिटीहरुको सुझाबको आधारमा सर्वसम्मत रुपमा गरेको अध्यक्ष श्रेष्ठको भनाई छ । बैठकले सम्माननीय पूर्व राष्ट्रपति विद्यादेवी भण्डारी राजनीतिमा आउन नहुने पार्टी केन्द्रको निर्णयलाई समेत सर्मथन गरेको अध्यक्ष श्रेष्ठको भनाई छ । दोलखा एमालेको मत पूर्व राष्ट्रपतिलाई दलगत राजनीतिमा आउनबाट रोक्नुपर्ने नै रहेको अध्यक्ष श्रेष्ठले बताउनु भयो ।
नेकपा एमाले दोलखा जिल्ला कमिटी सचिवालयको २०८२ असार ७ गतेको बैठकले विधानमा उमेर तथा कार्यकालको सीमा लगाईनु नहुने र सम्माननीय पूर्व राष्ट्रपति पुनः दल विशेष राजनीतिमा फर्कन नहुने सर्वसम्मत निर्णय गरी केन्द्रलाई सुझाब पठाएको अध्यक्ष श्रेष्ठको भनाई छ । सोही अनुसार पार्टी केन्द्रले हाम्रो निर्णयलाई सम्बोधन गरेकोले सातौ जिल्ला कमिटी बैठकले धन्यवाद दिने निर्णय समेत गरेको छ– अध्यक्ष श्रेष्ठले भन्नु भयो ।
बैठकमा सहभागि नेकपा एमालेका पोलिटब्युरो सदस्य एवम् दोलखा जिल्ला इन्चार्ज पार्वत गुरुङ अहिलेको परिस्थितिमा नेकपा एमालेको नेतृत्वको लागि सम्माननीय प्रधानमन्त्री एवम् पार्टी अध्यक्ष केपी शर्मा ओलीको विकल्प छैन भन्ने कुरा दोलखा एमालेले देशभरीमै पहिलो पटक कमिटीगत रुपमा निर्णय गरेको बताउनु हुन्छ ।
उमेर हद र कार्यकालको सीमा लगाउन नहुने तथा पूर्व राष्ट्रपतिलाई दलगत राजनीतिमा आउन रोक्ने कुरा ठिक भएको एमाले दोलखाको निर्णय स्वागत योग्य र दुरदर्शी रहेको पोलिटब्युरो सदस्य गुरुङले बताउनु भयो ।
एमाले दोलखा जिल्ला कमिटीको सातौ बैठकले पार्टीको जिल्ला कमिटीहरुलाई समन्वयकारी नभै कार्यकारीनै बनाउनु पर्ने, ३३ प्रतिशत महिला र युवाहरुको प्रतिनिधित्व हुने गरी पार्टी कमिटीहरुलाई समावेशी बनाउनु पर्ने, पार्टी सदस्यहरुलाई उत्पादनसंग जोड्ने कुरा विधानमै समावेश गरिनु पर्ने लगायतका निर्णय गरेको उमाले दोलखाका उप सचिव एवम् प्रचार विभाग प्रमुख हरि ओलीले बताउनु भयो । बैठकले जिल्ला कमिटीमा रिक्त दुई सदस्यमा गौरीशङ्कर गाँउपालिकाका उपाध्यक्ष उमा लुङ्गेली मगर र राजेश श्रेष्ठलाई मनोनयन गर्ने निर्णय समेत गरेको ओलीले बताउनु भयो ।
एमाले दोलखाले पार्टी केन्द्रले पठाएको विधान मसौदामा सुझाव दिन टोल, वडा तथा पालिका कमिटीहरुमा तालिका बनाएरै छलफल चलाएको थियो ।
पार्टी बैठक पछि दोलखाको प्रदेश ख बाट निर्वाचित सांसद भरत बहादुर केसी बागमति प्रदेश सरकारको बन तथा वातावरण मन्त्रीमा नियुक्त हुनु भएकोमा बधाई तथा शुभकामना दिईएको थियो ।
प्रतिक्रिया दिनुहोस्