दोलखा/दोलखाको गौरीशङ्कर गाँउपालिका वडा नम्बर ७ मार्बु टोपाटारमा पहिराले घर बगाउदा एक बालकको मृत्यु भएको छ भने तीन जना बेपत्ता भएका छन् ।
विहिवार रातिको अविरल बर्षापछि आएको पहिरोमा परी टोपाटारका कृष्ण बहादुर मगरको घर बगाउदा कृष्णबहादुरसंगै उनको श्रीमती देव मगर र हरिलाल श्रेष्ठ बेपत्ता छन् भने स्थानीय तीन बर्षको प्रिन्स थामी मृत भेटिएको जिल्ला प्रहरी कार्यालय दोलखाका प्रहरी नायव उपरीक्षक दिपक खड्काले बताउनु भयो ।
पहिरोले स्थानीय यज्ञ थामी, टपेन्द्र गुरुङ र घनश्याम खत्रीको घर समेत पूर्ण रुपमा क्षति पुगेको वडा नम्बर ७ का वडा अध्यक्ष सोनाम शेर्पाले जानकारी दिनु भयो । पहिरोमा परी यज्ञ थामी, उनको श्रीमती धनकुमारी थामी तथा बुहारी सिता थामी घाईते भएको वडा अध्यक्ष शेर्पाले बताउनु भयो । घाईतेलाई उद्दार गरी हेलिकप्टरबाट उपचारको लागि काठमाडौँ लाने तयारी भै रहेको प्रहरी नायव उपरीक्षक खड्काले जानकारी दिनु भयो ।
पहिरोले १५ भन्दा बढी घरहरु जोखिममा रहेको र पुल समेत बगाएकोले उद्धारमा कठिनाई भएको स्थानीयको भनाई छ । अहिले जनपथ प्रहरी, शसस्त्र प्रहरी र नेपाली सेनाको टोलिले खोज तथा उद्धारको काम गरिरहेको प्रहरी नायव उपरीक्षक खड्काले बताउनु भयो ।
प्रतिक्रिया दिनुहोस्