चरिकोट/ बालबालिकाको मनोविज्ञानमा शिक्षाप्रति सकारात्मक प्रभाव पार्ने र उनीहरूलाई पढाइप्रति थप आकर्षित गर्ने उद्देश्यका साथ चरिकोट स्थित एपेक्स स्कुलले ‘दीक्षान्त समारोह’ सम्पन्न गरेको छ।
२०७८ सालदेखि जिल्लामै पहिलो पटक यस्तो नविनतम कार्यक्रमको सुरुवात गरेको विद्यालयले यस वर्ष पनि विद्यार्थी, अभिभावक र शिक्षकहरूको उत्साहजनक सहभागितामा कार्यक्रमलाई निरन्तरता दिएको हो। शिक्षासँगै उत्साह र आकर्षण दीक्षान्त समारोहको मुख्य लक्ष्य साना बालबालिकाहरूलाई दीक्षित गरी उनीहरूमा “पढ्नुपर्छ र सिक्नुपर्छ” भन्ने आत्मविश्वास जगाउनु रहेको विद्यालयले जनाएको छ।
औपचारिक पोसाकमा सजिएका साना विद्यार्थीहरू जब मञ्चमा दीक्षित भए, उनीहरूको अनुहारमा देखिएको चमकले कार्यक्रमको सान्दर्भिकता पुष्टि गरेको थियो। कार्यक्रममा विद्यार्थीहरूले विभिन्न सांस्कृतिक नृत्य र गायन प्रस्तुत गरेर उपस्थित सबैलाई मन्त्रमुग्ध पारेका थिए। बालबालिकाको प्रतिभा प्रस्फुटनका लागि यस्ता मञ्चहरू निकै फलदायी हुने सहभागीहरूले बताए।
कार्यक्रममा अभिभावकहरूले विद्यालयले अवलम्बन गरेको यस किसिमको सिकाई पद्धति र बालबालिकालाई प्रोत्साहन गर्ने शैलीको प्रशंसा गर्नुभयो। उहाँहरूका अनुसार, यस्ता कार्यक्रमले बालबालिकालाई विद्यालय आउन र नयाँ कुरा सिक्न थप प्रेरणा मिल्नेछ। दीक्षान्त समारोहलाई थप मनोरञ्जनात्मक र प्रयोगात्मक बनाउन अभिभावक र शिक्षक-शिक्षिका बीच ‘टग अफ वार’ (डोरी तान्ने खेल) आयोजना गरिएको थियो। यस खेलले विद्यालय र अभिभावक बीचको सम्बन्धलाई थप मजबुत बनाउनुका साथै बालबालिकाहरूलाई एकता र खेलकुदको महत्त्व समेत दर्शाएको विद्यालयका प्रिन्सिपल नसिव कायष्थले बताउनु भयाे।
“बालबालिकाको मस्तिष्कमा पढाइ बोझ होइन, बरु यो एउटा उत्सव हो भन्ने छाप पार्न हामीले २०७८ सालमै जिल्लामा पहिलो पटक दीक्षान्त समारोह सुरु गरेका हौँ। यसले उनीहरूको शैक्षिक यात्रामा एउटा नयाँ ऊर्जा थप्ने विश्वास लिएका छौँ- प्रिन्सिपल कायष्थले बताउनु भयाे।
कार्यक्रमले एपेक्स स्कुलले केवल किताबी ज्ञानमा मात्र सीमित नरही बालबालिकाको सर्वाङ्गीण विकास र उनीहरूको मनोविज्ञानलाई बुझेर अघि बढिरहेको सन्देश दिएको अभिभावकहरु काे भनाई छ।
प्रतिक्रिया दिनुहोस्