दोलखा/दोलखाको भीमेश्वर नगरपालिका वडा नम्बर २ सोक्ला भ्यालीमा रक क्लाईम्विङ महोत्सवको तयारी गरिएको छ । आगामी जेठ १८ र १९ गते सञ्चालन हुने सोक्ला रक क्लाईविङ महोत्सवमा झण्डै तीन सयको सहभागिता रहने अपेक्षा गरिएको आयोजक सोक्लाश्वरी पर्यटन विकास समाजका अध्यक्ष अर्जुन पाख्रिनले बताउनु भयो ।
चार सय मीटरको उँचाईमा रहेको सोक्लाको भीरमा आयोजना गरिने रक क्लाईम्विङको लागि २५/२५ मीटरको दुई वटा सिंगल पीचको रक रुट तयार गरिएको पाख्रिनले बताउनु भयो ।
नेपाल पर्यटन बोर्डको सहकार्यमा आयोजना हुन लागेको सोक्ला रक क्लाईम्विङ महोत्सवको लागि माउन्टेण्ड गाईड एशोसिएसन अफ नेपालका अध्यक्ष सञ्जिव गुरुङ, उपाध्यक्ष तथा ८ औं पटक सहगरमाथा आरोही पासाङ भोटे र महाचिव रामकाजि तिवारीको टिमले दुई वटा रुट निर्माण गरेको हो ।
रक क्लाईम्विङ महोत्सवले सोक्ला क्षेत्र आन्तरिक तथा बाह्य पर्यटकहरुको गन्तव्य बन्ने, सोक्ला भ्याली जिल्लाकै रक क्लाईम्विङ हवको रुपमा विकास हुने, जिल्लाको स्काउट टिमको लागि आपतकालिन उद्धार तालीम सञ्चालनको केन्द्र बन्ने, भीमेश्वर नगरपालिकाको मात्रै नभएर जिल्लाकै साहसिक पर्यटकीय गन्तव्यको रुपमा सोक्ला गाउँको प्रवद्र्धन हुने विश्वास लिईएको आयोजक सोक्लाश्वरी पर्यटन विकास समाजका अध्यक्ष पाख्रिनले बताउनु भयो ।
सदरमुकाम चरिकोटबाट ८ किलोमिटरको दूरीमा रहेको सोक्ला गाँउ धार्मिक एवं सांस्कृतिक रुपमा समेत महत्वपूर्ण रहेको अध्यक्ष पाख्रिनको भनाई छ ।
सत्य युगमा तामाकोशीलाई रोकेर ताल बनाउन कालिञ्चोक क्षेत्रबाट ल्याईएका डिलढुंगाहरु अहिले पनि सोक्ला गाँउमा इतिहास भएर उभिएका छन् । वन झाँक्री बस्ने गुफादेखि सोक्लाश्वर महादेवसम्मको कथा यो क्षेत्रको ऐतिहासीक किंवदन्ति बनेर रहेको छ । सोक्ला क्षेत्रमा माघ १ गते बाघ नुहाँउने ढुंगेधारादेखि गुमडाँडा पर्वतसम्मको किंवदन्ती र नागबेली तामाकोशीको सुन्दरता हेर्न सकिने स्थानीय बताउछन् ।
प्रतिक्रिया दिनुहोस्